एमडीएमएसका विद्यार्थीलाई निर्वाह भत्ता नदिन निजी मेडिकल कलेजहरूले दिए चेतावनी

प्राविधिक शिक्षा

गृहपृष्ठ
प्राविधिक शिक्षा

एमडीएमएसका विद्यार्थीलाई निर्वाह भत्ता नदिन निजी मेडिकल कलेजहरूले दिए चेतावनी

ईडीयू सवाल मंगलबार, भदौ २५, २०८१

काठमाडौँ - चिकित्सा शिक्षाको स्नातकोत्तर तहमा अध्ययन गर्ने विद्यार्थीको सुविधाबारे चिकित्सा शिक्षा आयोगले गरेको निर्णय कार्यान्वयन गर्न निजी मेडिकल कलेजले अटेरी गरेका छन्। विद्यार्थीलाइ निर्वाह भत्ता ४८ हजार रुपैयाँ कुनै पनि हालतमा उपलब्ध गराउन नसक्ने, बरु स्नातकोत्तर तहको पढाइ नै नगर्ने सम्मको चेतावनी निजी मेडिकल कलेज सञ्चालकहरुले चेतावनी दिएका छन्।

आयोगले एमडी, एमएस अध्ययन गर्ने विद्यार्थीलाई आठौं तहका स्वास्थ्यकर्मीको तलब स्केल बराबर निर्वाह भत्ता दिनुपर्ने निर्णय गरेको थियो। यो निर्णयविरुद्ध मेडिकल कलेज सञ्चालक विरोधमा उत्रिएपछि चिकित्सा शिक्षाको स्नातकोत्तर तहको पढाइ नै प्रभावित हुने देखिएको छ।

चिकित्शा शिक्षा आयोगले स्वास्थ्य मन्त्रालयको निर्णय बमोजिम स्नातकोत्तर तहका विद्यार्थीको निर्वाह भत्ता बृद्धि गरेको हो। चिकित्सा शिक्षाको स्नातकोत्तर तह एमडी/एमएस पढाइ हुने शिक्षण संस्था २१ वटा छन्। त्यसमध्ये १७ वटा निजी मेडिकल कलेज छन्।

३ वर्षे एमडी, एमएस अध्ययन गर्ने विद्यार्थीहरु पढाइका अतिरिक्त बिरामीको उपचारमा निरन्तर खटिनु परे पनि निजी मेडिकल कलेजहरुले निर्वाह भत्ताबापत मासिक २० हजार रुपैयाँमात्र दिँदै आएका थिए। चिकित्सा शिक्षा आयोगले अबदेखि उनीहरुलाई आठौं तहका स्वास्थ्यकर्मीको तलब स्केल बराबर अर्थात् ४८ हजार रुपैयाँ दिन निर्देशन दिएपछि कलेज सञ्चालकहरु विरोधमा उत्रिएका छन्।

एमडी, एमएस अध्ययन गर्ने विद्यार्थीको निर्वाह भत्ता दोब्बरभन्दा बढी वृद्धि गर्ने निर्णय गरेपछि निजी मेडिकल कलेजहरुले सेल्फ अप्राइजल नै भर्न बहिस्कार गरेका छन्। एमडी, एमएसको अध्ययन शुल्क २३ लाख रुपैयाँ निर्धारण गरिएको छ।

प्रकाशित मिति: मंगलबार, भदौ २५, २०८१ १२:४६