निजी मेडिकल तथा डेन्टल कलेजले रेजिडेन्ट चिकित्सक तथा एमबीबीएस र बीडीएस इन्टर्नलाई भत्ता उपलब्ध गराउन नसक्ने

प्राविधिक शिक्षा

गृहपृष्ठ
प्राविधिक शिक्षा

निजी मेडिकल तथा डेन्टल कलेजले रेजिडेन्ट चिकित्सक तथा एमबीबीएस र बीडीएस इन्टर्नलाई भत्ता उपलब्ध गराउन नसक्ने

ईडीयू सवाल बुधबार, साउन २७, २०८३

काठमाडौँ- निजी मेडिकल तथा डेन्टल कलेज सञ्चालकहरूले पीजीमा अध्ययनरत रेजिडेन्ट चिकित्सक तथा एमबीबीएस र बीडीएस इन्टर्नलाई भत्ता उपलब्ध गराउन नसक्ने बताएका छन् ।
एसोसिएसन अफ प्राइभेट मेडिकल एन्ड डेन्टल कलेज अफ नेपालले सबै निजी मेडिकल तथा डेन्टल कलेजहरूलाई पत्राचार गर्दै अर्को निर्णय नभएसम्मका लागि पीजी निर्वाह भत्ता तथा इन्टर्न विद्यार्थीका लागि सिर्जना गरिएको कुनै पनि आर्थिक दायित्व उपलब्ध वा भुक्तानी नगर्न भनेको छ ।

पीजी रेजिडेन्ट चिकित्सकको बढाइएको निर्वाह भत्ता तथा एमबीबीएस तथा बीडीएस इन्टर्न विद्यार्थीको थप आर्थिक दायित्व अहिलेको अवस्थामा निजी मेडिकल तथा डेन्टल कलेजहरूले धान्न सक्ने अवस्था नरहेको एसोसिएसनको भनाइ छ। ‘निजी मेडिकल कलेजहरूले आफ्नै ठूलो लगानीमा आवश्यक पूर्वाधार निर्माण गरी शिक्षण अस्पताल सञ्चालन, उपकरण तथा प्रविधि व्यवस्थापन, प्राध्यापक तथा स्वास्थ्य जनशक्तिको व्यवस्था र चिकित्सा शिक्षा र स्वास्थ्य सेवा प्रवाहमा महत्त्वपूर्ण योगदान पुर्याउँदै आएको छ,’ विज्ञप्तिमा भनिएको छ, ‘सबै दायित्व निजी संस्थाले आफ्नै स्रोतबाट वहन गर्दै आएको अवस्थामा थप आर्थिक दायित्व सिर्जना गर्ने कुनै पनि निर्णय गर्नुअघि सम्बन्धित संस्थाको वास्तविक आर्थिक अवस्था र क्षमता बुझ्नुपर्छ।’

यसअघि उपलब्ध गराउँदै आएको २० हजार निर्वाह भत्तालाई ४८ हजार ७३७ बनाउँदा कलेजहरूलाई आर्थिक भार पर्ने याथार्थलाई सरकारी निकायले समेत स्वीकारेको भन्दै एसोसिएसनले यसका लागि सरकारले निजी मेडिकल तथा डेन्टल कलेजको अध्ययन सिट संख्या बढाउँदै लैजाने सहमति भएको उल्लेख गरेको छ।