त्रिविकाे पाठ्यक्रम परिमार्जनबारे छलफल

विश्वविद्यालय

गृहपृष्ठ
विश्वविद्यालय

त्रिविकाे पाठ्यक्रम परिमार्जनबारे छलफल

ईडीयू सवाल मंगलबार, पुस १६, २०८१

काठमाडौँ - त्रिभुवन विश्वविद्यालयको द्वन्द्व, शान्ति र विकास अध्ययन विभागले पाठ्यक्रम परिमार्जनबारे छलफल शुरु गरेको छ। यसै वर्ष स्तरोन्नति भएको केन्द्रीय विभागले मानविकी तथा सामाजिक शास्त्र संकायका चार पूर्वडिनहरूलाई बोलाएर पाठ्यक्रम परिमार्जनबारे छलफल गरेको हो। द्वन्द्व, शान्ति, विकासका आयाम र परिवेश फेरिएको भन्दै विभागले समय अनुकूल पाठ्यक्रम परिमार्जन गर्न छलफल कार्यक्रम गरेको हो।

त्रिभुवन विश्वविद्यालयका पूर्वउपकुलपति प्राध्यापक डा. शिवलाल भुसालले श्रमबजार केन्द्रित कार्यक्रम बनाउन सुझाव दिए। उनले द्वन्द्वका आयामहरु फेरिएको भन्दै प्राज्ञिक पहिचानका विषयमा केन्द्रित हुन सुझाव दिए।

पूर्वडिन एवं प्राध्यापक डा. नवराज कणेलले अनुसन्धानमुखी पाठ्यक्रममा जोड दिए। नयाँ पाठ्यक्रम निर्माण गर्दा विश्वपरिवेश र नेपालको आवश्यकता ध्यान दिन सुझाव दिँदै उनले विश्वविद्यालयका कार्यक्रमहरुलाई अनुसन्धान केन्द्रित बनाउनुपर्ने बताए।पूर्वडिन प्राध्यापक डा. रमेश कुँवरले ज्ञान र प्रविधिको खाडललाई कम गर्ने पाठ्यक्रमको आवश्यकता औंल्याए। उनले अन्तरविधात्मक विषयवस्तुलाई समावेश गर्न सुझाव दिए।

निवर्तमान डिन प्राध्यापक डा. कुसुम शाक्यले विद्यालयहरुले काम गर्दै अध्ययन गर्न उपयुक्त हुने पाठ्यक्रम निर्माण गर्न सुझाव दिइन्। उनले एम.ए. तहको कार्यक्रम सकेसम्म दुई वर्ष अवधिको उचित हुने बताइन्।
द्वन्द्व, शान्ति र विकास अध्ययन विभागका प्रमुख डा. पिताम्बर भण्डारीले द्वन्द्व, शान्ति र विकासका बहुआयामिक पक्षहरू समेट्न खोजेको बताए। उनले रणनीतिक अध्ययन र अन्तर्राष्ट्रिय सम्बन्ध एवं अर्थराजनीतिका सम्बन्धका विषयहरु कार्यक्रममा थपिएको बताए।

प्रकाशित मिति: मंगलबार, पुस १६, २०८१ १७:२१