त्रिवि केन्द्रीय क्याम्पसमा पाँच विद्यार्थी संगठनद्वारा एक महिनादेखि ताला

विश्वविद्यालय

गृहपृष्ठ
विश्वविद्यालय

त्रिवि केन्द्रीय क्याम्पसमा पाँच विद्यार्थी संगठनद्वारा एक महिनादेखि ताला

ईडीयू सवाल बुधबार, पुस २४, २०८१

काठमाडाैँ - त्रिभुवन विश्वविद्यालयको केन्द्रीय क्याम्पसमा एक महिनादेखि ताला लागेको छ। पार्किङ शुल्कको विषयमा पाँच विद्यार्थी संगठनले २५ मंसिरमा ताला लगाएका थिए। अहिलेसम्म पनि सहमति नभएको कारण एक महिनादेखि तला लाग्दा दैनिक कामकाज ठप्प भएको छ।

‘शिक्षक कर्मचारीलाई तलब खुवाउने बेला भयो। ताला लागेका कारण दैनिक कामकाज गर्न पाएका छैनौँ,’ क्याम्पसका प्रिन्सिपल ध्यानेन्द्र राईले बताए।प्रिन्सिपल कार्यालयमा लगाइएको ताला खुलाउने विषयमा छलफल भइरहेको राईले बताए। ‘छलफल गरिरहेका छौँ। सहमतिको प्रयास भइरहेको छ,’ उनले भने।

त्रिविको स्वतन्त्र विद्यार्थी युनियन (स्ववियु) ले नेपाल प्रिमियर लिग (एनपीएल) को पहिलो दिन पार्किङबाट अपारदर्शी ढंगले शुल्क उठाएको आरोपमा पाँच विद्यार्थी संगठनले ताला लगाएका छन्।

तर, स्ववीयुका पदाधिकारीहरूले आफूहरूले शुल्क नउठाएको दाबी गर्दै आएका छन्। ताला लगाउनेमा अखिल क्रान्तिकारी, अनेरास्ववियू, अखिल छैटौं, अखिल समाजवादी, नेपाल समाजवादी विद्यार्थी युनियन रहेका छन्।

यही विषयमा स्ववियूको कार्यालय र रजिस्ट्रार कार्यालय अन्तर्गतको सामान्य प्रशासन महाशाखामा पनि ताला लगाइएको छ।

प्रकाशित मिति: बुधबार, पुस २४, २०८१ १४:३३