५ महिनापछि खुल्यो संस्कृत विश्वविद्यालयकाे ताला

विश्वविद्यालय

गृहपृष्ठ
विश्वविद्यालय

५ महिनापछि खुल्यो संस्कृत विश्वविद्यालयकाे ताला

ईडीयू सवाल आइतबार, जेठ २५, २०८२

काठमाडाैँ - नेपाल संस्कृत विश्वविद्यालय केन्द्रीय कार्यालय बेलझुन्डीमा पाँच महिनाअघि लगाइएको ताला शुक्रबार खुलेको छ। विश्वविद्यालयको वार्ता समिति र माओवादीनिकट अनेरास्ववियु क्रान्तिकारीबीच पाँचबुँदे सहमति भएपछि शुक्रबार ताला खोलिएको हो।

अनेरास्ववियु क्रान्तिकारीले विभिन्न माग राख्दै गत १२ पुसमा विश्वविद्यालयको केन्द्रीय कार्यालयको मूल गेटमा ताला लगाएको थियो। गत फागुनमा अनुसन्धान केन्द्रको कार्यालयमा तालाबन्दी थियो। तालाबन्दीपछि विश्वविद्यालयले राष्ट्रिय सांस्कृतिक अध्ययन केन्द्रका कार्यकारी निर्देशक जर्मन चौधरीको संयोजकत्वमा वार्ता समिति गठन गरेको थियो।

सहमति जुटाउन नसकेपछि समितिले दुई महिनामै राजीनामा दिएको थियो। त्यसपछि प्राध्यापक अर्जुनप्रसाद भट्टराईको संयोजकत्वमा तीन सदस्यीय वार्ता समिति गठन भएको थियो । समितिका सदस्यहरूमा उपप्राध्यापक विनोद आचार्य र उपप्रशासक अनिल पोख्रेल थिए।

विश्वविद्यालय र अनेरास्ववियु क्रान्तिकारीबीच विश्वविद्यालयको केन्द्रीय आयुर्वेद विद्यापीठमा पठनपाठनलाई सहज गराउन प्रयोगात्मक सामग्री आउँदो असारभित्र खरिद गर्ने सहमति भएको छ। प्रयोगात्मक अभ्यासका लागि आवश्यक अस्पताल, जनशक्ति र सामग्रीको प्रक्रिया मिलाउन आगामी विश्वविद्यालयसभामा प्रस्ताव लैजाने अर्को सहमति छ।

विश्वविद्यालयको परीक्षा प्रणालीलाई निष्पक्ष, भयरहित बनाउन आयुर्वेद अध्ययन संस्थानका डिन, सहायक डिन र प्राचार्यजस्ता पदाधिकारी अनुगमन गर्ने निकाय भएका कारण उनीहरूबाट प्रश्नपत्र निर्माण, उत्तरपुस्तिका परीक्षण र सम्परीक्षणजस्ता काम नगर्ने सहमति भएको छ।

पदाधिकारीका विषयमा प्राप्त उजुरीका आधारमा कार्यकारी परिषद्ले एक महिनाभित्र छानबिन गरी दोषी पाइए पुनगर्ठन गर्ने पनि सहमति छ।

प्रकाशित मिति: आइतबार, जेठ २५, २०८२ १६:२१