त्रिविको परीक्षासम्बन्धी कामका लागि काठमाडौँ आउनुपर्ने अवस्था अन्त्य गर्न विद्यार्थीकाे माग

विश्वविद्यालय

गृहपृष्ठ
विश्वविद्यालय

त्रिविको परीक्षासम्बन्धी कामका लागि काठमाडौँ आउनुपर्ने अवस्था अन्त्य गर्न विद्यार्थीकाे माग

ईडीयू सवाल सोमबार, माघ १२, २०८२

काठमाडौँ - त्रिभुवन विश्वविद्यालयका विद्यार्थीहरूले परीक्षासम्बन्धी कामका लागि देशका जुनसुकै कुनाबाट पनि काठमाडौँ नै आउनुपर्ने अवस्था अन्त्य गर्न माग गरेका छन्। विश्वविद्यालयका स्ववियु सभापति दीपकराज जोशीका अनुसार विश्वविद्यालयले परीक्षा प्रणाली विकेन्द्रीकरण नगर्दा मौका परीक्षा तथा स-साना कामका लागि पनि काठमाडौँ नै आउनुपर्ने विद्यार्थीको बाध्यता रहेको छ। ‘खासगरी दुर्गमका र कमजोर शारीरिक अवस्थाका विद्यार्थी यसबाट बढी पीडित छन्’, उनले भने।

मागबारे ध्यानाकर्षण गराउन आजदेखि परीक्षा नियन्त्रण कार्यालयको प्रवेशद्वारमा धर्ना सुरु गरिएको सभापति जोशीले जानकारी दिए। यसको समाधानका लागि कम्तीमा आफ्ना प्रदेश भित्रै परीक्षा दिन पाउने व्यवस्था हुनुपर्ने विद्यार्थीको माग छ। ‘विश्वविद्यालय एप चलाउन पटक-पटक भन्यौँ, तर अहिलेसम्म भएको छैन। त्रिविको परीक्षा नियन्त्रण कार्यालय समयअनुरूप डिजिटल हुन नसक्नु र काठमाडौँ केन्द्रित संरचनाका कारणले विद्यार्थीले अनावश्यक दुःख पाइरहेका छौँ’, स्ववियु सदस्य प्रदीप कार्कीले भने। पहिलेभन्दा केही सुध्रिए पनि अधिकांश नतिजा ढिलो आउने गरेको उनको भनाइ छ।

विद्यार्थीले हरेक प्रदेशमा मौका परीक्षा केन्द्र, परीक्षा प्रणालीको पुनःसंरचना, शोधपत्रको मूल्यांकन प्रदेशमै, समयमै परीक्षा र समयमै नतिजाको सुनिश्चितता, पूर्ण डिजिटल प्रणाली, प्रमाणपत्र वितरणको विकेन्द्रीकरण तथा पुनः योग र पुनःपरीक्षणको सुदृढीकरण जस्ता माग राखेका छन्।

प्रकाशित मिति: सोमबार, माघ १२, २०८२ १७:१९