नक्कली प्रमाणपत्र देखाएर जागिर खाने त्रिविका सह–परीक्षा नियन्त्रकलाई ६ महिना जेल

विश्वविद्यालय

गृहपृष्ठ
विश्वविद्यालय

नक्कली प्रमाणपत्र देखाएर जागिर खाने त्रिविका सह–परीक्षा नियन्त्रकलाई ६ महिना जेल

ईडीयू सवाल बिहीबार, माघ २९, २०८२

काठमाडौँ - नक्कली शैक्षिक योग्यता (विद्यावारिधि) को आधारमा त्रिभुवन विश्वविद्यालयको सह–परीक्षा नियन्त्रक पदमा नियुक्त भएका डिल्लीराम प्रसाईँलाई विशेष अदालतले भ्रष्टाचार मुद्दामा दोषी ठहर गरेको छ।

बुधबार विशेष अदालतका अध्यक्ष सुदर्शनदेव भट्ट तथा न्यायाधीशहरू डिल्लीरत्न श्रेष्ठ र विदुर कोइरालाको इजलासले प्रसाईँलाई ६ महिना कैद र १० हजार रुपैयाँ जरिवाना गर्ने फैसला सुनाएको हो। साथै प्रसाईँले अपराध पीडित संरक्षण ऐन, २०७५ बमोजिम पीडित राहत कोषमा ४०० रुपैयाँ जम्मा गर्नुपर्ने अदालतले फैसला गरेको छ।

प्रसाईँले त्रिभुवन विश्वविद्यालय क्षेत्रीय परीक्षा नियन्त्रण कार्यालय, विराटनगरको सह–परीक्षा नियन्त्रक पदका लागि आवेदन दिँदा आफूले ’विद्यावारिधि’ प्राप्त गरिसकेको भनी स्वघोषणा गरेका थिए।

सोही झुट्टा विवरणका आधारमा उनले मूल्याङ्कन समितिबाट ८ अङ्क प्राप्त गरे र २०८१ मंसिर १८ गते उपकुलपतिबाट नियुक्तिको पत्र समेत पाए। तर, अनुसन्धानका क्रममा उनले आवेदन दिने समयमा विद्यावारिधि प्राप्त गरिनसकेको खुलेको थियो।

त्रिवि अनुसन्धान समितिको निर्णय अनुसार उनले २०८१ माघ २९ गते मात्र उक्त उपाधि प्राप्त गरेको देखिएको छ। यसरी उपाधि नै नपाएको समयमा आफूसँग डिग्री भएको झुट्टा विवरण पेस गरी सरकारी लाभ (पद) लिएको पुष्टि भएपछि उनी विरुद्ध भ्रष्टाचार मुद्दा चलाइएको थियो। अन्य प्रतिवादीहरूले जयलक्ष्मी प्रधान, मेघराज पोखरेल र मोतीलाल शर्माले भने सफाइ पाएका छन्।

प्रकाशित मिति: बिहीबार, माघ २९, २०८२ १०:१९