अध्ययन बिदा दुरुपयोग गर्ने त्रिविका प्राध्यापकबाट १० करोडभन्दा बढी रकम असुल

विश्वविद्यालय

गृहपृष्ठ
विश्वविद्यालय

अध्ययन बिदा दुरुपयोग गर्ने त्रिविका प्राध्यापकबाट १० करोडभन्दा बढी रकम असुल

ईडीयू सवाल बिहीबार, जेठ २१, २०८३

काठमाडौँ- अध्ययन बिदामा रहेर लामो समयसम्म सेवामा नफर्किएका त्रिभुवन विश्वविद्यालयका प्राध्यापकहरूले विश्वविद्यालयलाई बुझाउनुपर्ने रकम धमाधम फिर्ता गर्न थालेका छन्। हालसम्म ४१ जना प्राध्यापकबाट १० करोड ४६ लाख ५६ हजार ८०४ रुपैयाँ असुल भई विश्वविद्यालयको पेन्सन कोषमा जम्मा भएको छ।

अध्ययन बिदाको दुरुपयोग गरी सेवामा नफर्किएका प्राध्यापकहरूको विषयमा सरकारी तहबाट चासो बढेपछि रकम असुली प्रक्रिया तीव्र बनाइएको हो। छानबिन समितिका संयोजक डा. जीवन काफ्लेका अनुसार अध्ययन बिदामा रहेका १९१ प्राध्यापकमध्ये ४१ जनाले रकम फिर्ता गरिसकेका छन् भने ६२ जनाले रकम बुझाउन समितिसमक्ष निवेदन दिएका छन्। तीमध्ये ५४ जनालाई समितिले औपचारिक पत्राचार गरिसकेको छ।

शिक्षा तथा खेलकुद मन्त्रालयले अध्ययन बिदामा गएर सेवामा नफर्किएका प्राध्यापकहरूबाट कबुलियतअनुसारको रकम यथाशीघ्र असुल गर्न निर्देशन दिएपछि विश्वविद्यालयले यो प्रक्रियालाई थप प्रभावकारी बनाएको हो।
समितिले रकम फिर्ता नगरेका प्राध्यापकहरूलाई तत्काल दायित्व पूरा गर्न आग्रह गरेको छ। विश्वविद्यालयका निमित्त उपकुलपति सुशिल बहादुर बज्रचार्यले कानुनी प्रक्रिया पूरा गरी पटक–पटक सूचना जारी गरिएको उल्लेख गर्दै निर्धारित अवधिमा सम्पर्कमा नआए कानुनबमोजिम कारबाही हुन बताए।

विश्वविद्यालयका अनुसार अध्ययन बिदामा विदेश गएर सेवामा नफर्किने प्राध्यापकहरूको कारण त्रिविले दुई अर्ब रुपैयाँभन्दा बढी आर्थिक क्षति व्यहोरेको अनुमान गरिएको छ। आर्थिक नोक्सानीसँगै शैक्षिक तथा नैतिक असरसमेत परेको विश्वविद्यालयको भनाइ छ।

त्रिवि कार्यकारी परिषद्ले गत २०८१ पुस २५ गते डा. जीवन काफ्लेको संयोजकत्वमा तीन सदस्यीय छानबिन समिति गठन गरेको थियो। समितिमा कृष्णहरि आचार्य र दीपक तिवारी सदस्य रहेका छन्। समितिले गरेको अध्ययनमा कुल ३९८ प्राध्यापकले अध्ययन बिदाको दुरुपयोग गरेको भेटिएको छ। तीमध्ये १९१ जना अध्ययन बिदा लिएर सेवामा नफर्किएका छन् भने २०७ जनाले अध्ययन पूरा नगरेको प्रतिवेदनमा उल्लेख छ।

प्रकाशित मिति: बिहीबार, जेठ २१, २०८३ १२:२६