सीटीइभीटीको एकेडेमिक काउन्सिलमा विभिन्न क्षेत्रका चार विज्ञलाई सदस्यका रूपमा मनोनयन

प्राविधिक शिक्षा

गृहपृष्ठ
प्राविधिक शिक्षा

सीटीइभीटीको एकेडेमिक काउन्सिलमा विभिन्न क्षेत्रका चार विज्ञलाई सदस्यका रूपमा मनोनयन

ईडीयू सवाल बिहीबार, असार १८, २०८३

काठमाडौँ - शिक्षा तथा खेलकुद मन्त्रालयले प्राविधिक शिक्षा तथा व्यावसायिक तालिम परिषद् (सीटीइभीटी) को एकेडेमिक काउन्सिलमा विभिन्न क्षेत्रका चार प्रतिष्ठित विज्ञलाई सदस्यका रूपमा मनोनयन गरेको छ।

मन्त्रालयले सूचना प्रविधि तथा डिजिटल नीति विज्ञ डा. अमृता शर्मा, नेपाल उद्योग परिसंघका अध्यक्ष वीरेन्द्रराज पाण्डे, कारखानाका सह संस्थापक तथा स्टेम शिक्षा विज्ञ डा. दिपेश्वरमान श्रेष्ठ तथा नर्सिङ र जनस्वास्थ्य क्षेत्रकी विज्ञ प्रमिला रानालाई काउन्सिल सदस्यमा नियुक्त गरेको हो।

मन्त्रालयका अनुसार विभिन्न क्षेत्रका विज्ञहरूको सहभागिताले प्राविधिक तथा व्यावसायिक शिक्षालाई समयानुकूल, गुणस्तरीय र श्रम बजारको आवश्यकता अनुरूप विकास गर्न सहयोग पुग्ने अपेक्षा गरिएको छ। सीटीइभीटीको एकेडेमिक काउन्सिल परिषद्को शैक्षिक तथा प्राज्ञिक नेतृत्व गर्ने प्रमुख निकाय हो। काउन्सिलले पाठ्यक्रम विकास तथा परिमार्जन, नयाँ शैक्षिक कार्यक्रमको स्वीकृति, शैक्षिक गुणस्तर सुनिश्चितता, मूल्याङ्कन प्रणालीको सुधार तथा प्राविधिक एवं व्यावसायिक शिक्षाको दीर्घकालीन नीतिगत दिशा निर्धारण गर्ने महत्त्वपूर्ण भूमिका निर्वाह गर्दै आएको छ।

मन्त्रालयले यी मनोनयनबाट उद्योग, सूचना प्रविधि, स्टेम शिक्षा, स्वास्थ्य तथा प्राविधिक शिक्षाबीचको सहकार्य अझ सुदृढ हुने तथा सीटीइभीटीको शैक्षिक सुधार अभियानले थप गति लिने विश्वास व्यक्त गरेको छ।

प्रकाशित मिति: बिहीबार, असार १८, २०८३ १३:२९