काठमाडाैँ - एक्मी इन्जिनियरिङ कलेज अन्तर्गतको एक्मी क्लब अफ आईटीद्वारा ‘टेक फेस्ट २.०’ सम्पन्न भएकाे छ। टेक फेस्ट भदौ १२ र १३ गते (विहीबार र शुक्रबार) बसुन्धारा स्थित एक्मी इन्जिनियरिङ कलेजको प्राङ्गणमा आयाेजना गरिएकाे हाे। फेस्टमा विद्यार्थीहरूको उल्लेखनीय सहभागिता रहेको थियो।
फेस्टमा विभिन्न कलेजमा अध्ययनरत इन्जिनियरिङ तर्फका विद्यार्थीहरूले विज्ञान र प्रविधि तर्फको नविनम प्रयोगलाई जोड दिदैँ निर्माण गरेका उपकरण, एआई, इलेक्ट्रिक बाइक, हाइड्रो प्रोजेक्ट, आर्कीटेक्ट डिजाइन, कन्सट्रक्सन र मेकानिकल इक्युप्मेन्टलाई टेक फेस्टमा प्रदर्शन गरिएकाे थियाे।
पूर्वाञ्चल विश्वविद्यालयका डीन प्रा डा भोलानाथ घिमिरे प्रमुखअतिथि रहेका यस फेस्टकाे उद्घाटन टोखा नगरपालिकाका मेयर प्रकाश अधिकारीले गरेका थिए। फेस्टमा आयाेजकले उत्कृष्ट प्रदर्शन गर्ने विद्यार्थी टाेलीलाइ १ लाख पुरस्कार निर्धारण गरेकाे थियाे।
आफूहरूले सिकेको सीपलाई व्यवहारमा उतार्दै प्रदर्शन गर्ने हिसाबले क्लबले यस कार्यक्रमको आयोजना गरेको र यसमा आफूहरूले निर्माण गरेका प्रोजेक्टहरू प्रदर्शन गरेको कान्तिपूर सिटी कलेजमा सिभिल इन्जिनियरिङ विषय अध्ययनरत विद्यार्थीले हाइड्रो प्रोजेक्टको बारेमा जानकारी दिए।
कार्यक्रमको मुख्य आकर्षणको रुपमा एरोस्पेस इन्जिनियरिङ तर्फको द स्वाड अफ चेन्ज मेकरले निर्माण गरेको प्लेनलाई प्रदर्शनिमा राखिएको थियाे। यसलाई निर्माण गरेर विभिन्न प्राकृतिक प्रकोप र जोखिमहरूमा उद्धारका लागि प्रयोग गर्न सकिने संस्थाका प्रवन्ध निर्देशक सुसिल भट्टराईले जानकारी दिए।
विभिन्न नविनतम प्रविधिको विकाससँगै नेपालमा इन्जिनियरिङ शिक्षा अध्ययन गरेका विद्यार्थीले विश्ववजारमा प्रतिस्पधी उपकरण र प्रविधिको विकास गर्न सक्ने उदाहरण फेस्टमा विद्यार्थीहरूले देखाएका थिए। एक्मी इन्जिनियरिङ कलेजले पनि यस्ता क्रियाकलापमा जोड दिदैँ आगामी दिनमा पनि यस्ता कार्यक्रमको आयोजना गर्दै विद्यार्थीलाई खोज अनुसन्धान तर्फ थप उत्प्रेरित गर्ने जनाएको छ।
