त्रिविको सम्पत्ति खाेज्न पूर्वसचिव त्रितालकाे संयाेजकत्वमा समिति गठन

विश्वविद्यालय

गृहपृष्ठ
विश्वविद्यालय

त्रिविकाे सम्पत्ति खाेज्दै सरकार त्रिविको सम्पत्ति खाेज्न पूर्वसचिव त्रितालकाे संयाेजकत्वमा समिति गठन

ईडीयू सवाल शुक्रबार, जेठ १८, २०८१

काठमाडाैँ- सरकारले त्रिभुवन विश्वविद्यालयको नाममा काठमाडौँ उपत्यकाभित्र रहेका जग्गा तथा चलअचल सम्पत्तिको खोजी गर्न पूर्वसचिव शारदाप्रसाद त्रितालको संयोजकत्वमा समिति गठन गरेकाे छ।

बिहीबार बसेकाे मन्त्रीपरिषद् बैठकले समितिको सदस्यसचिवमा शिक्षा, विज्ञान तथा प्रविधि मन्त्रालयका उपसचिव रहने र सदस्यहरूमा पूर्वसहसचिवद्वय महेन्द्रकुमार थापा र जानकीबल्लभ अधिकारी, त्रिविका विज्ञ सदस्य प्रा डा प्रेमसागर चापागाईंलाई नियुक्त गरेको सञ्चार तथा सूचना प्रविधिमन्त्री रेखा शर्माले जानकारी दिइन्।

समितिले त्रिविका नाममा विभिन्न ठाउँमा रहेका जग्गामध्ये प्रारम्भिक चरणमा उपत्यकाभित्रको जग्गाको अध्ययन, अनुसन्धान तथा छानबिन एवं भवनलगायत अन्य चलअचल सम्पत्तिको खोज तथा लगत सङ्कलन, संरक्षण, उपयोग, व्यवस्थापन र आवश्यक अन्य कार्यका लागि अध्ययन गरी ठोस प्रतिवेदन पेस गर्ने जनाएको छ।

विश्वविद्यालय अनुदान आयोगको सदस्य पदमा त्रिविका उपकुलपति प्रा डा केशरजङ्ग बराललाई मनोनयन गर्ने निर्णय गरेको छ।मन्त्रिपरिषद्ले तिलगङ्गा आँखा विश्वविद्यालय सम्बन्धमा व्यवस्था गर्न बनेको विधेयक सङ्घीय संसद्समक्ष पेस गर्ने तथा सूचना प्रविधि तथा साइबर सुरक्षाका सम्बन्धमा व्यवस्था गर्न बनेको विधेयक तर्जुमा गर्न सैद्धान्तिक स्वीकृति दिएको छ।

प्रकाशित मिति: शुक्रबार, जेठ १८, २०८१ १८:२६